चितवन – सेन्ट्रल कलेज चितवन जिल्ला ए डिभिजन लिगमा केबिए ग्लोबल भरतपुर फुटबल क्लब (बिएससी) र सेन्ट्रल कलेज एभरेष्ट क्लबले जित हात परेका छन् । सौराहा युवा समाज र नारायणगढ फुटबल क्लब (एनएफसी) भने बराबरीमा रोकिएका छन् ।
लिग अन्तर्गत आज (शनिबार) भएको पहिलो खेलमा सौराहा र एनएफसी १-१ को बराबरीमा रोकिएका हुन् । जारी लिगमा सौराहाको यो लगातार दोस्रो बराबरी हो । सौराहा यसअघि पहिलो खेलमा नारायणी मोटर्स युनिक क्लब बसेनीसंग २-२ को बराबरीमा रोकिएको थियो। लगातार दोस्रो बराबरीपछि सौराहाले समूह ‘ए’ मा २ अंक बटुलेको छ। एनएफसी भने पहिलो खेलमा बिएफसी संग ४-० ले पराजित भएको छ । आजको बराबरीपछि एनएफसीको एक अंक भएको छ।
प्रतिस्पर्धात्मक खेलमा एनएफसीले पहिलो हाफमा अग्रता लिएको थियो। खेलको १० औं मिनेटमा दीपजङ्ग तामाङले गोल गर्दै एनएफसलाई अग्रता दिलाएका थिए । तर एनएफसीको अग्रता पहिलो हाफसम्म मात्रै सीमित रह्यो। दोस्रो हाफमा सौराहाले बराबरी गोल फर्कायो । ५९ औं मिनेटमा सन्जय चौधरीले गोल गर्दै खेलमा बराबरी गरे। खेलको म्यान अफ दि म्याच एनएफसीका सागर लोप्चम घोषित भए।
आजको दोस्रो खेलमा बिएससीले माडी ११ विरुद्ध रोमाञ्चक जित दर्ता गरेको छ । बिएफसीले माडी ११ लाई २-१ ले पराजित गरेको हो । रोमाञ्चक खेलमा बिएफसीलाई जिताउन राजले दुई गोल गरे । माडीका रितेश क्षेत्रीले एक गोल फर्काए ।
खेलको पहिलो हाफ गोलरहित बराबरीमा सकिएको थियो । तिनै गोल दोस्रो हाफमा भएको हो । दोस्रो हाफको तेस्रो मिनेटमा मैदान प्रवेश गरेका राजले बिएफसीलाई सुरुवाती अग्रता दिलाएका थिए । उनले ५३ औं मिनेटमा गोल गर्दै बिएफसीलाई अग्रता दिलाए ।
६० औं मिनेटमा रितेशले गोल गर्दै माडीलाई खेलमा फर्काउने संकेत गरेका थिए । उनले सुन्दर हेडर गोल गर्दै खेलमा १-१ को बराबरी गरे । अतिरिक्त समयको दोस्रो मिनेटमा राजले व्यक्तिगत दोस्रो गोल गर्दै बिएफसीलाई २-१ को जित दिलाए । उनले माडीका डिफेन्डरलाई बिट गर्दै आकर्षक गोल गरे ।
खेलको म्यान अफ दि म्याच बिएफसीका क्याप्टेन विशाल बिक घोषित भए । जितसँगै दुई खेलबाट ६ अंक बनाएको बिएफसी समूह ‘ए’ को शिर्ष स्थानमा छ । माडी समान खेलबाट ३ अंकसहित दोस्रो स्थानमा छ ।
आजकै तेस्रो खेलमा एभरेष्ट क्लबले हर्दी युवा समाजलाई २-ले पाखा लगायो । प्रतिस्पर्धात्मक खेलमा एभरेष्टलाई जिताउन आशिष गजुरेल र सन्देश तामाङले गोल गरे । दुबै गोल पहिलो हाफमा सम्भव भएको थियो । हर्दीले खेलमा फर्किने थुप्रै अवसर पाए पनि एभरेष्टका गोलरक्षक बिरेन्द्र मल्ल ठकुरीले बिफल पारिदिए ।
खेलको १९ औं मिनेटमा आशिषको गोलबाट एभरेष्टले अग्रता लिएको थियो । उनले डि बक्स बाहिरबाट सुन्दर गोल गरे । पहिलो हाफको अतिरिक्त समयको दोस्रो मिनेटमा सन्देशले गोल गर्दै एभरेष्टलाई दोहोरो अग्रता दिलाए । दोस्रो हाफमा एभरेष्टले अग्रता लम्बाउने अवसर पाएको थियो । ७० औं मिनेटमा एभरेष्टले पेनाल्टी पाएको थियो । तर एभरेष्टका आशिषको पेनाल्टी हर्दीका गोलरक्षक जनुराम चौधरीले बचाए । खेलमा थप गोल हुन सकेन र एभरेष्ट २-० बिजयी भयो । खेलको म्यान अफ दि म्याच एभरेष्टका गोलरक्षक बिरेन्द्र मल्ल ठकुरी घोषित भए ।
जितसँगै एभरेष्टले ३ अंक पाएको छ । यससँगै समूह ‘बी’ मा रहेको एभरेष्ट दुई खेलबाट ६ अंक बटुल्दै अंक तालिकाको शिर्ष स्थानमा यथावत छ । समान खेल खेलेको हर्दीको ३ अंक छ ।
लिग अन्तर्गत भोलि (आइतबार) दुई खेल हुनेछ । आइतबारको पहिलो खेल रामपुर फुटबल क्लब रड्स र एष्ट्रल युथ सोसाइटीबीच हुनेछ । यो खेल दिउँसो १ बजे हुनेछ । यि दुबै टोली पहिलो जितको खोजिमा हुनेछन् । रामपुर पहिलो खेलमा बगान यात्रा ग्रुपसँग १-० ले पराजित भएको थियो भने एस्ट्रल हर्दीसँग २-१ ले पराजित भएको थियो ।
आइतबारकै दोस्रो खेलमा बगान यात्रा ग्रुप र नारायणी फुटबल क्लब भिड्नेछन् । यो खेल दिउँसो ३:३० बजे हुनेछ । यात्रा लगतार दोस्रो जितको खोजीमा हुनेछ । यात्राले पहिलो खेलमा रामपुरलाई १-० ले हराएको थियो । उता नारायणी भने पहिलो जितको खोजीमा हुनेछ । नारायणी पहिलो खेलमा बिएफसीसँग ४-० ले पराजित भएको थियो ।
चितवन जिल्ला फुटबल संघको आयोजनामा जारी लिग माघ ८ गतेसम्म चल्नेछ । लिगमा १३ टोली सहभागी छन् । लिग बिजेताले ट्रफीसहित एक लाख पाउनेछ भने उपबिजेताले ५० हजार प्राप्त गर्नेछ । तेस्रो र चौथो हुने टोलीले समान २५-२५ हजार प्राप्त गर्नेछ ।
-
१.
-
२.
-
३.
-
४.
-
५.
-
६.
-
७.
-
८.
-
९.
-
१०.
-
१.
-
२.
-
३.
-
४.
-
५.
-
६.
-
७.
-
८.
-
९.
-
१०.