सचिव पदमा प्रत्यासी त धेरै हुनुहुन्छ तर प्रतिनिधिले तपाईलाई नै भोट किन दिने ?
यो प्रश्न सबै प्रतिनिधिको मन मस्तिष्कमा खेल्ने प्रश्न हो । प्रजातान्त्रिक अभ्यासमा सचिव पदजस्तो गरिमामय एवं जिम्मेवारी बढी भएको पदमा प्रत्यासीहरु धेरै हुनु नौलो बिषय होइन ।
तर पार्टीमा संगठनमा हिजोदेखि कसको योगदान कति छ भन्ने कुरा नेता कार्यकर्ताले मुल्यांकन गर्ने कुरा हो । मेरो हकमा भन्नुहुन्छ भने अघि पनि मैले भनिसकें म सानो उमेरदेखि संगठनमा क्रियाशील व्यक्ति हुँ । दोस्रो जनआन्दोलन ०६२÷६३ को क्रममा समेत म जेल जीवन बिताएको मान्छे । ममा केही योगदान दिउँ भन्ने हुटहुटी, जांँगर र जोश पनि छ । मैले आम नेता कार्यकर्ताको मन र विश्वास पनि जितेको छु भन्ने लाग्छ । हिजोका दिनमा मतदाताहरुले जिताउनका लागि मात्रै मत दिने गर्थे । पछिल्लो समय मानिसमा सोच , चेतनामा परिवर्तन आएको छ ।मत खेर नजाओस र कसलाई मत दिंदा समग्र पार्टी , संगठन, देश र समाजलाई कतिको फाइदा हुन्छ भन्ने कुरा मतदातामा चेतना विकसित हुँदै आएको छ । म विश्वासका साथ भन्न चाहन्छु उहाँहरुले म जत्तिको युवा तथा योग्य व्यक्तिलाई मत दिएर आफ्नो मतको सदुपयोग गर्न जान्नु भएकै छ । साथै नाता ,वर्ग भूगोल, जात र गुट हेरेर मलाई भोट नदिनुहोस् । भोट भिक्षा होइन माग्ने आउनेलाई दिने । मसँग संगठन निर्माण सम्बन्धि थुप्रै मुद्दाहरु छन् । ती मुद्दाहरुलाई सम्बोधन गर्न र स्थापित गर्न मलाई भोट दिनुहोस् भनेर आम मतदातासँग नम्र निवेदन गर्दछु ।

पार्टीलाई गतिशील बनाउने तपाईसँग के कस्ता एजेण्डा छन् जुन अरुसँग छैनन ?
एजेण्डा मसँगमात्र होइन अरु उमेदवार साथीहरुसँग पनि हुन्छन् नै ।चुनावमा विभिन्न एजेण्डा उठ्नु र उठाउनु सामान्य र नियमित प्रक्रिया हो । तर बोल्नु र कार्यान्वयन गर्नु फरक बिषय हो । र उनीहरुले उठाएका मुद्धा साँच्चै जायज र व्यवहारिक छन् र कार्यान्वयन हुन लायक वा सम्भव छन् त भन्ने बिषय महत्वपूर्ण हो ।

उम्मेदवारले उठाएका त्यस्ता मुद्दाहरु पुरा गर्न के ऊ साच्चै सक्षम छ त ? ऊ कस्तो स्कुलिङबाट आएको छ ? उसले राजनितिलाई कसरी बुझेको छ ? ऊ भित्र कत्तिको इमान र नैतिकता छ ? मतदाता प्रतिनिधिहरुले बुझ्नु पर्ने कुरा यी हुन् । बिरालोले दुधको सुरक्षा गर्छु भन्यो भने त पक्कै पनि कसैले विश्वास गर्दैन होला । त्यसैले मैले भन्ने गरेको छु कि भोट (मत) भनेको विश्वास हो । विश्वास कसलाई गर्ने या कसलाई नगर्ने त्यो पक्कै पनि २१ औं शताब्दीका साथीहरुले बुझ्नु भएको छ । मलाई उहाँहरुको विवेकमाथिपूर्ण विश्वास छ ।

त्यसो भए मतदातालाई आकर्षित गर्ने तपाईँका मुल मुद्धा के के हुन् ?
पहिलेदेखिनै भन्दै आएको छु मैले मुख्यतया २ वटा मुद्दा उठाएको छु । पहिलो नीतिगत सुधारका मुद्दा । अर्को व्यवस्थापकीय सुधारका मुद्दा । राजनीतिमा क्रियाशिल मान्छेले सम्मान सहयोग र सहभागिता खोजेको हुन्छ । यी कुराहरु सुनिश्चित नगर्ने हो भने मान्छे राजनीतिमा आउनै चाहदैन । मान्छे विभेद हुनुहुन्न भन्छ तर ऊ सधै सकारात्मक विभेदको कुरा गरिरहेको हुन्छ । जुन कुरा एक हिसाबले जायज पनि छ । राजनीतिमा डँडेलो लगाउने र निभाउनेको एउटै मूल्यांकन त हुन सक्दैन नि । हैन? यी कुराहरुको विषयमा गफ गरेर र चर्का भाषण गरेर मात्र हुँदैन । यी र यस्ता थुप्रै विषयलाई पार्टीले आफ्नो नीतिमा समेटेर साथीहरुलाई भरोसा दिलाउनु पर्ने पहिलो आवश्यकता देखेको छु ।
त्यसैगरी पार्टीले चलाउने विभिन्न कार्यक्रमहरु चाहे आन्दोलन होस् चाहे चुनावी अभियान होस चाहे पार्टीका अन्य गतिविधि नै किन नहुन् त्यस्ता कार्यक्रमलाई व्यवस्थित,मर्यादित, अनुशासित र वैज्ञानिक ढंगबाट संचालन गर्ने विषयमा संकीर्ण परम्परालाई हटाउँदै जनचाहना बमोजिमका आधुनिक तौरतरिकासाथ अगाडि सार्नुपर्छ भन्ने मेरो स्पष्ट धारणा छ ।

तपाईलाई थाहा नै छ पार्टीमा दुईबटा खेमा हाबी छन् । उमेद्वारी पनि त्यसरी नै दिने गरिएको छ । तपाई कुन खेमाको उम्मेदवार हो ?
म स्थायी टिममा विश्वास गर्ने मान्छे होइन । टिम मुद्दा मिल्नेहरुको बन्नु पर्छ भन्ने मान्छे हो । म गुटमा भन्दा गुण र एकतामा विश्वास गर्ने मान्छे । त्यसैले मैले उठाएका मुद्दा जोसँग मिल्छ म त्यही टिमको उम्मेदवार हो । तर एउटा कुरामा म के विश्वस्त छु भने टिमवर्क विना हाम्रा मुद्दालाई स्थापित गराउन सक्दैनौं । माथि केन्द्रमा जो जसको मान्छे भएपनि जिल्लामा कम्तिमा विचार र मुद्धा मिल्नेहरु एक हौं भन्ने गरेको छु । गुट उपगुटले पार्टीलाई हित गर्दैन । महाधिवेशनले हामी एक भएको सन्देश पनि दिन सक्नु पर्छ भन्ने मेरो धारणा हो । हेरौं के हुन्छ ।

कुनै एउटा टिमको साथ समर्थन विना चुनाव जित्न सक्छु जस्तो लाग्छ तपाईलाई ?
म शेरबहादुर दाई, रामचन्द्र दाई, विमलदाई, शशाङ्क दाई, प्रकाशमानदाई, शेखर दाई सबैलाई उत्तिकै आदर र सम्मान गर्दछु । उहाँहरु हाम्रो पार्टीको सम्मानित र शिर्षस्थ नेताहरु हुनुहुन्छ । मैले कहिल्यै पनि निरपेक्ष विरोध र समर्थन कसैको गरेको छैन । गर्नेपनि छैन । अर्को कुरा व्यक्तिभन्दा संस्था ठुलो हुन्छ । नेताको गुण र दोषको आधारमा आफ्नो धारणा राख्दै आएको छु । म पार्टीलाई मायाँ गर्ने मान्छे हुँ ।त्यसैले पार्टी संगठनलाई माया गर्ने सबैले मलाई भोट दिनुहुन्छ भन्ने कुरामा म विश्वस्त छु ।

जिल्लामा सभापतिपदका लागि पनि थुप्रै आकांक्षीहरु छन् ।तपाईको सभापति चाहीँ को हो त ?
म अहिले अधिवेशनको संघारमै आईपुग्दा छलफलमै छु । सबैसँग संवाद गरिरहेको छु । कोही कसैसँग मेरो आग्रह, पूर्वाग्रह छैन । जो सभापति भएपनि मिलेर कामगर्न सक्छु भन्ने आत्मविश्वास मसँग छ । इमान र नैतिकताको राजनीतिमा जो अब्बल देखिन्छन, म उहाँसँगै हुन्छ ।

प्रतिनिधि साथीहरुलाई केही सन्देश दिनचाहनु हुन्छ कि ?
सन्देश दिने म त्यति ठूलो मान्छे पनि होइन र बन्न पनि चाहन्न । म सबैलाई सम्मान आदर गर्न चाहन्छु । बिपीले भने जस्तै म सबै साथीहरुको मन मस्तिष्कमा बस्न लायकको एउटा असल मान्छे बन्न चाहन्छु । र मानिस ब्रेडले होइन ब्रेनले चल्नुपर्छ भन्ने बिपीको सन्देश स्मरणगर्न सबैलाई अनुरोध गर्न चाहन्छु ।