चितवन । देवघाट महामहोत्सव आज १०औं दिनमा प्रवेश गरेको छ। आजदेखि किशोरशरण जी महाराजको शिव महापुराण वाचन सुरु हुँदैछ। बिहान ८ बजेबाट प्रारम्भ हुने यस प्रवचनले हजारौं श्रद्धालु भक्तजनलाई भक्ति र आध्यात्मिकतामा डुबाउने विश्वास गरिएको छ। मधुरता र भक्तिभावका स्रोत किशोरशरण जी महाराजले नेपाल र भारतभरका धार्मिक स्रोता माझ आफ्नो भक्तिरसमय कथाका माध्यमबाट विशेष ख्याती कमाउनुभएको छ।
आजै सुप्रसिद्ध कथावाचिका देवी प्रतिभाजीको विदाईको दिन पनि हो। दिउँसो २ बजे आयोजना हुने विदाई कार्यक्रममा देवीजीले आफ्नो दश दिनको कथा वाचन पूरा गरी भक्तजनहरूसँग विदा लिनुहुनेछ। महोत्सवभरि उहाँले भागवत महापुराणको भावपूर्ण व्याख्या गर्दै लाखौं भक्तजनको मन जित्नुभएको थियो। विदाई समारोहका क्रममा देवीजीले विश्वकै कान्छी कथावाचिका अनुराधा पाण्डेयलाई आज विशेष रूपमा कथा मंचमा स्वागत गर्नुहुनेछ । आज दिउँसो ३ बजे देवघाट महोत्सवमा आधिकारिक रूपमा आफ्नो कथा वाचन सुरु गर्नुभन्दा अघि अनुराधालाई विशेष पाल्किमा राखेर नगर परिक्रमा गराई सम्मानपूर्वक मंचमा विराजमान गराइनेछ। सानै उमेरदेखि संस्कृत, हिन्दी र नेपाली भाषामा कथा वाचन गर्दै श्रोताहरूलाई मन्त्रमुग्ध पार्न सफल पाण्डेयले महोत्सवभरि सात दिनसम्म कथा वाचन गर्नुहुनेछ।
उहाँको आगमनले महोत्सवलाई थप भव्यता र भक्तिभावले भरिने अपेक्षा गरिएको छ।
आयोजकहरूका अनुसार, महोत्सवका बाँकी २१ दिनसम्म धार्मिक गतिविधिहरू नियमित रूपमा सञ्चालन हुनेछन्। हरेक दिन बिहान ८ बजेदेखि साँझ ५ बजेसम्म कथा प्रवचन हुनेछन्। साँझ ५ बजेपछि गण्डकी महाआरतिको भव्य कार्यक्रम सञ्चालन हुनेछ। आरतिका क्रममा गण्डकी नदी किनारमा दीपप्रज्ज्वलन गर्दै विशेष पूजाआजा गरिनेछ ।
देवघाट महामहोत्सवमा दिनदिनै श्रद्धालुहरूको संख्या बढ्दो छ। आयोजकहरूको अनुमान अनुसार, हरेक दिन हजारौं भक्तजनले महोत्सवका कार्यक्रमहरूमा सहभागीता जनाइरहेका छन्। आयोजकहरूले बाँकी कार्यक्रमहरूमा पनि उपस्थित हुन सम्पूर्ण भक्तजनलाई विशेष निमन्त्रणा गरेका छन्। विशेषतः किशोरशरण जी महाराजको शिव महापुराण, अनुराधा पाण्डेयको कथा वाचन, र गण्डकी महाआरतिको अवसरलाई जीवनमा दुर्लभ उपलब्धिका रूपमा लिन आग्रह गरिएको छ।
देवघाट महामहोत्सवको १०औं दिन महत्त्वपूर्ण धार्मिक गतिविधिहरूको सुरुआत, एक ख्यातिप्राप्त व्यक्तित्वको विदाई, र अर्को विशिष्ट व्यक्तित्वको स्वागतको दिनका रूपमा यादगार बन्नेछ। आयोजकहरूको सुव्यवस्थित भव्य व्यवस्थापन र भक्तजनहरूको उत्साहले महोत्सवलाई अझै प्रभावकारी बनाइरहेको छ। यो पावन अवसरमा सहभागी भएर पुण्य लाभ लिनका लागि सबैलाई निमन्त्रणा गरिएको छ।
-
१.
-
२.
-
३.
-
४.
-
५.
-
६.
-
७.
-
८.
-
९.
-
१०.
-
१.
-
२.
-
३.
-
४.
-
५.
-
६.
-
७.
-
८.
-
९.
-
१०.