चितवन – सेन्ट्रल कलेज चितवन जिल्ला ‘ए’ डिभिजन लिगको हेभिवेट भिडन्तमा केबीए ग्लोबल भरतपुर फुटबल क्लब (बीएफसी) ले बाजी मारेको छ । आज (बुधबार) सम्पन्न दोस्रो खेलमा बीएफसीले नारायणगढ फुटबल क्लब एनएफसीलाई ४-० को फराकिलो अन्तरले पराजित गरेको हो ।
सुरुवातदेखि नै एनएफसीमाथि हाबी भएको बीएफसीले पहिलो हाफमा नै ३ गोल गर्न सफल भएको थियो । अर्को एक गोल दोस्रो हाफमा सम्भव भयो । बीएफसीको जितमा राज भुसालले २ तथा प्रियस तामाङ र असिम गुरुङले समान १-१ गोल गरे ।
खेलको आठौं मिनेटमा प्रियसले गोल गर्दै बीएफसीलाई सुरुवाती अग्रता दिलाएका थिए । १६ औं मिनेटमा राजले बीएफसीलाई दोहोरो अग्रता दिलाए । ३१ औं मिनेटमा राजले व्यक्तिगत दोस्रो गोल गरेपछि पहिलो हाफमा नै बीएफसीले ३-० को अग्रता लियो ।
दोस्रो हाफमा बीएफसीले थप एक गोल गर्यो । खेलको ७५औं मिनेटमा असिमले राजको पासमा गोल गर्दै बीएफसीलाई ४-० को फराकिलो जित दिलाए । खेलको म्यान अफ दि म्याच दुई गोल गर्न सफल बीएफसीका राज भुसाल घोषित भए ।
जितसंगै बीएफसी ३ अंकसहित समूह ‘ए’ को शिर्ष स्थानमा उक्लिएको छ । समान अंक भए पनि माडी ११ गोल आधारमा दोस्रो स्थानमा छ ।
यसअघि आजै सम्पन्न पहिलो खेलमा माडीले गीतानगर ब्वाइजलाई ४-१ ले पराजित गरेको थियो । माडीको जितमा सुमन महतोले दुई तथा किशोर चौधरी र विशाल सुनारले समान एक-एक गोल गरे । गीतानगरका सोमकुमार श्रेष्ठले एक गोल फर्काए । खेलको पहिलो हाफमा गीतामगरविरुद्ध माडी हाबी भएको थियो ।
पहिलो हाफको अतिरिक्त समयमा माडीले गोल गर्दै अग्रता लियो । माडीका सुमन महतोले सुन्दर गोल गर्दै पहिलो हाफमा अग्रता दिलाए । त्यस अघि पहिलो हाफमै माडीले गोल गर्ने केही अवसर खेर फाल्यो । गीतानगरले पनि पहिलो हाफमा केहि अवसर खेर फालेको थियो ।
पहिलो हाफमा १-० ले पछि परेको गीतानगरले दोस्रो हाफमा लयमा फर्कियो । खेलको ४८औं मिनेटमा गीतानगरका सोम बहादुर श्रेष्ठले रिबाउन्डमा गोल गर्दै खेलमा बराबरी गरे ।
अन्तिम १५ मिनेटमा गीतानगरविरुद्ध माडी फेरि हाबी भयो । खेलको ६७ औं मिनेटमा माडीले अग्रता लियो । माडीका सुमन महतोले व्यक्तिगत दोस्रो गोल गर्दै माडीलाई २-१ को अग्रता दिलाए ।
गीतानगरविरुद्ध लगातार आक्रमण गरेको माडीले ७१ औं मिनेटमा अग्रता लम्बायो । ७१ औं मिनेटमा किशोर चौधरीले गोल गर्दै माडीलाई ३-१ को अग्रता दिलाए । वैकल्पिक खेलाडीको रुपमा मैदान प्रवेश गरेका विशाल सुनारले दोस्रो हाफको अतिरिक्त समयको दोस्रो मिनेटमा गोल गर्दै माडीलाई ४-१ को सहज जित दिलाए ।
खेलको म्यान अफ दि म्याच माडीका लागि दुई गोल गरेका किशोर महतो घोषित भए ।
लिगमा बिहीबार पनि दुई खेल हुँदैछ। बिहीबारको पहिलो खेलमा एस्ट्रोल युथ सोसाइटी र हर्दी युवा समाज भिड्नेछन् । यो खेल दिउँसो १ बजे हुनेछ । यस्तै बिहीबार दिउँसो ३:३० बजे एभरेष्ट क्लब र नारायणी फुटबल क्लबबीच खेल हुनेछ।
चितवन जिल्ला फुटबल संघको आयोजनामा जारी लिग माघ ८ गतेसम्म चल्नेछ । लिगमा १३ टोली सहभागी छन् ।
लिग बिजेताले ट्रफीसहित एक लाख पाउनेछ भने उपबिजेताले ५० हजार प्राप्त गर्नेछ । तेस्रो र चौथो हुने टोलीले समान २५-२५ बजार प्राप्त गर्नेछ ।
-
१.
-
२.
-
३.
-
४.
-
५.
-
६.
-
७.
-
८.
-
९.
-
१०.
-
१.
-
२.
-
३.
-
४.
-
५.
-
६.
-
७.
-
८.
-
९.
-
१०.