राप्तीमा जंगली हात्तीको आक्रमणबाट एकजनाको मृत्यु ,एक घाईते

संवाददाता

आइतबार, कार्तिक २१, २०७८ मा प्रकाशित

चितवन । चितवनमा जंगली हात्तीको आक्रमणबाट एकजनाको मृत्यु भएको छ भने अर्का घाईते भएका छन । मृत्यु हुनेमा राप्ती नगरपालिका वडा नम्बर १ का सागर लामा रहेका छन् भने सोही स्थानका कृष्ण लामा घाईते भएका हुन् ।
जिल्ला प्रहरी कार्यालय, चितवनका अनुसार शनिबार राती ८ बजेको समयमा कृष्ण लामा, सागर लामा र अर्का साथी शक्ती गुरुङ राप्तीको ड्याम साईडमा घुम्न गएको बेला जंगली हात्तीले आक्रमण गरेको थियो । आक्रमणबाट कृष्ण लामा सामान्य घाईते भएको र गुरुङ भाग्न सफल भएका थिए भने सागर लामा वेपत्ता भएका थिए । सागर लामालाई खोजतलास गर्ने क्रममा आज बिहान . ७ बजेर ५० मिनेटको समयमा मकवानपुर जिल्ला मनहरी गाउंँ पालिका वडा नम्बर ६ खयरघारी स्थित लोथर खोलाको पारी पट्टि मृत अबस्थामा फेला परेको कार्यालयका प्रवक्ता सूर्य बहादुर थापाले जानकारी दिनुभयो ।