बञ्जाडे र झाँक्री मगरसहित २५ वटा कविता वाचन गरिएको उक्त कार्यक्रममा बिहान ११ बजेदेखि दिउँसो ३ बजेसम्म सहभागी नचलमलाई बसिरहे । र, कविता सुनिरहेँ ।

असारको मध्यमा निरन्तर परिरहेको झरीको पर्वाह नगरी प्रदेशका विभिन्न जिल्लाबाट सहभागी हुन आएका साहित्यकारको भीडबाट बेलाबेला तालीको गडगडाहटको स्वर गुञ्जिरह्यो । दिनभर बर्दघाट नगरपालिकाको सभाहलमा कवि र कविताबारेमा छलफल पनि चल्यो । सोही अवसरमा पत्रकारसमेत रहनुभएका दाङका स्रष्टा नविन अभिलाषीले

आफ्नै पसिनाको उर्वर भूगोलमा हामी अनन्त दुःखका असली उपभोक्ता मात्र बन्यौँ,
आगो छुटेको प्रमिथस जस्तो, कालो कुवाभित्र कैद गरिएका दास जस्तो भयौँ’
वाक्यांश सहित ‘पुनश्चः प्रायश्चित’ शीर्षकको कविताले धेरैलाई सोचमग्न बनायो ।

लुम्बिनी प्रदेशमा रहेका एक सय नौ स्थानीय तहमध्ये भाषा, साहित्य, कला र संस्कृतिको संरक्षण र सम्वद्र्धन गर्ने गरी नवलपरासीको बर्दघाट नगरपालिकाले प्राज्ञसभा गठन गरेको छ । सोही बर्दघाट प्रज्ञा–प्रतिष्ठानको आयोजनामा भएको प्रदेशस्तरीय कवि गोष्ठी तथा प्रतियोगिताका सहभागीले देश परिवेशका बारेमा कवितामार्फत आफ्नो चासो र चिन्ता जाहेर गरेका हुन् ।

‘प्रिय पत्रकार’ कविता प्रथम

बर्दघाट प्रज्ञा–प्रतिष्ठानले आयोजना गरेको लुम्बिनी प्रदेशस्तरीय प्रतियोगितात्मक कविगोष्ठीमा रोल्पाका टङ्कबहादुर झाँक्री मगरको ‘प्रिय पत्रकार’ शीर्षकको कविता पहिलो भएको छ कपिलवस्तुका शिशिर बन्जाडेको कविता ‘नेता बनुँ झैँ लाग्यो’ दोस्रो भयो । साथै नेपाल टेलिभिजनमा कार्यरत पत्रकार नवीन अभिलाषीको ‘पुनःप्रायश्चित’ कविता तेस्रो र पद्यमावती रिजालको कविता चौथो भयो ।

प्रदेशस्तरीय प्रतियोगितात्मक कविगोष्ठीमा पहिलोलाई रु २५ हजार, दोस्रोलाई रु २० हजार, तेस्रोलाई रु १५ हजार र चौथोलाई रु १० हजार नगदसहित प्रमाण पत्र प्रदान गरिएको थियो ।

प्रतियोगितात्मक कविगोष्ठीमा इमेलमार्फत प्राप्त भएका ५१ रचनामध्ये छनोटमा परेका २७ कवितामध्ये २५ वटा गोष्ठीमा वाचन गरिएको थियो । प्रतियोगितामा नवलपरासीका डा श्यामप्रसाद न्यौपानेको संयोजकत्व र रुपन्देहीका कविराज पौडेल र दाङका टीकाराम उदासी मगर मूल्याङ्कनकर्ता हुनुहुन्थ्यो ।

प्रमुख अतिथी लुम्बिनी प्रदेशसभा सदस्य विश्वप्रेम पाठकले साहित्य समाजको दर्पण भएको बताउनुभयो । प्रज्ञा–प्रतिष्ठानका कुलपति डा घनश्याम न्यौपानेले साहित्यिक उन्नयनका लागि स्थानीय तहले सहयोग गर्नुपर्ने भनाइ राख्नुभयो ।

उहाँले भन्नुभयो, “साठी वर्षदेखि कविता लेखिरहेको स्रष्टाका रुपमा यहाँ सहभागी हुन पाउँदा आफूलाई गौरवान्वित बनाएको छ ।” कार्यक्रममा बर्दघाट नगर प्रमुख तथा बर्दघाट प्रज्ञा–प्रतिष्ठानका प्रमुख संरक्षक शम्भुलाल श्रेष्ठले साहित्यको विकासका लागि सहयोग सधैँ जारी रहने बताउनुभयो । नगरपालिकाका उपप्रमुख तथा संरक्षक रुद्रप्रकाश उपाध्ययले बर्दघाट नगरले सोचेभन्दा महत्वपूर्ण राष्ट्रियस्तरको साहित्यिक कार्यक्रम गर्न पाउँदा खुसी लागेको बताउनुभयो ।

भाषा साहित्यका विद्वान प्राध्यापक होमनाथ पान्डेले भाषा साहित्यको विधामा सबैभन्दा जेठो विधा कविताले संसारलाई मार्गदर्शन गर्ने बताउनुभयो । उहाँले भन्नुभयो, “विज्ञान, दर्शन, शास्त्र, पुराण सबै कवितामय हुनुको पछाडि केही विशिष्ट लक्षण छन् ।”

बर्दघाट प्रज्ञा–प्रतिष्ठानका उपकुलपति टीकाबहादुर पहारीले समाज र देशको चित्रण गर्ने गरी प्रस्तुत भएका कविताको उचाइ धेरै माथि भएको बताउनुभयो । संस्थाका सदस्यसचिव वामदेव अधिकारीको सञ्चालनमा सम्पन्न कार्यक्रममा लुम्बिनी प्रदेशको बर्दिया, बाके, दाङ, रुकुम, रोल्पा, कपिलवस्तु, प्यूठान, अर्घाखाँची, गुल्मी, रुपन्देही, पाल्पा, नवलपरासी जिल्लाका कविको उपस्थिति थियो । रासस